Qərbi Azərbaycan İcması

Əziz Ələkbərli,

Milli Məclisin deputatı,

Qərbi Azərbaycan İcması

İdarə Heyətinin sədri

Azərbaycan son illərdə öz tarixinin ən mühüm siyasi mərhələlərindən birini yaşayır. Bu mərhələnin mahiyyətini yalnız əldə edilmiş hərbi-siyasi nəticələrlə izah etmək kifayət deyil. Qarşıda duran məsələ artıq qazanılmış nailiyyətlərin qorunması, möhkəmləndirilməsi və yeni reallıqların yaratdığı imkanlardan dövlətimizin uzunmüddətli inkişafı naminə maksimum səmərə ilə istifadə edilməsidir.

Bu gün Azərbaycan əvvəlki Azərbaycan deyil. Ölkəmizin regional və beynəlxalq mövqeyi, təhlükəsizlik imkanları, iqtisadi potensialı və xarici siyasətdə qazandığı etimad yeni siyasi reallıqlar formalaşdırıb. Bu reallıq Azərbaycanın qarşısında həm yeni imkanlar, həm də yeni məsuliyyətlər açır.

Məhz belə bir tarixi məqamda siyasi rəhbərliyin qarşısında duran əsas vəzifə emosiyalara deyil, milli maraqlara söykənən, uzaq perspektivi nəzərə alan və dəyişən dünyanın reallıqlarını düzgün qiymətləndirən siyasət yürütməkdir. Prezident İlham Əliyevin siyasi fəaliyyətində diqqəti cəlb edən əsas məqamlardan biri də məhz yüksək praqmatizmdir. Dövlət başçısının siyasətində məqsədlərin aydınlığı ilə siyasi vasitələrin çevikliyi bir-birini tamamlayır.

Bu praqmatizm təsadüfi yanaşma deyil. Onun arxasında Azərbaycan dövlətçiliyinin möhkəm siyasi təməli dayanır. Ulu Öndər Heydər Əliyevin yaratdığı dövlətçilik məktəbinin ən mühüm xüsusiyyətlərindən biri də reallığı düzgün qiymətləndirmək, zamanın tələblərini qabaqcadan görmək və milli maraqları bütün siyasi qərarların əsas meyarına çevirmək idi. Bu baxımdan Prezident İlham Əliyevin həyata keçirdiyi siyasət Ulu Öndərin müəyyən etdiyi strateji xəttin sadəcə davamı deyil, həm də yeni dövrün şərtlərinə uyğun şəkildə inkişaf etdirilməsidir. Məhz buna görə də Milli Məclisin materiallarında da cənab Prezident İlham Əliyevin siyasəti Ulu Öndərin strateji xəttinin davamı və möhkəmləndirilməsi kimi səciyyələndirilir.

Ulu Öndər Heydər Əliyevin siyasi irsinin əsas gücü ondan ibarətdir ki, bu irs konkret bir dövrün problemləri ilə məhdudlaşmır. Burada güclü dövlət, milli maraqların qorunması, siyasi sabitlik, iqtisadi inkişaf, beynəlxalq münasibətlərdə müstəqil mövqe və xalq-dövlət birliyi kimi fundamental prinsiplər var. Cənab Prezident İlham Əliyevin fəaliyyəti həmin prinsiplərin yeni tarixi şəraitdə necə tətbiq oluna biləcəyinin real nümunəsidir.

Bu gün Azərbaycanın qarşısında duran yeni siyasi mərhələnin əsas xüsusiyyəti də budur: artıq söhbət yalnız mövcud reallıqların qorunmasından getmir. Azərbaycan özünün yaratdığı yeni reallıqların siyasi, iqtisadi və diplomatik imkanlarını dəyərləndirməli, regional proseslərin fəal iştirakçısından onları formalaşdıran əsas dövlətlərdən birinə çevrilmək istiqamətində addımlarını davam etdirməlidir.

Dünya siyasətində də ciddi dəyişikliklər baş verir. Əvvəllər formalaşmış münasibətlər sistemi yenilənir, yeni güc mərkəzləri meydana çıxır, dövlətlər öz milli maraqlarını daha çevik və daha sərt şəkildə müdafiə etməyə çalışırlar. Belə bir şəraitdə kiçik və orta dövlətlərin qarşısında iki yol qalır: ya başqalarının müəyyən etdiyi gündəliyin iştirakçısına çevrilmək, ya da öz milli maraqlarına əsaslanan müstəqil siyasət yürütmək.

Azərbaycan ikinci yolu seçib.

Müstəqil xarici siyasət kursunun mahiyyəti də məhz bundan ibarətdir. Azərbaycan müxtəlif güc mərkəzləri ilə münasibətlər qurarkən öz milli maraqlarını əsas götürür, tərəfdaşlıq imkanlarını genişləndirir, eyni zamanda dövlətin suveren qərarvermə hüququnu qoruyur. Bu siyasət Azərbaycanın beynəlxalq münasibətlər sistemində etibarlı tərəfdaş kimi mövqeyini gücləndirən mühüm amillərdən biridir.

Yeni mərhələdə Azərbaycan üçün daha bir mühüm məsələ regionda davamlı sülhün və əməkdaşlığın təmin olunmasıdır. Müharibədən sonrakı dövr yalnız keçmiş münaqişənin nəticələrinin aradan qaldırılması ilə yekunlaşmır. Qarşıda yeni kommunikasiya imkanlarının açılması, iqtisadi əlaqələrin genişləndirilməsi, regional əməkdaşlıq formatlarının gücləndirilməsi və Cənubi Qafqazın təhlükəsizlik arxitekturasının yeni reallıqlara uyğun formalaşdırılması kimi mühüm vəzifələr dayanır.

Burada da praqmatik siyasətin əhəmiyyəti xüsusilə böyükdür. Çünki siyasətdə qələbəni əldə etmək qədər, onun nəticələrini düzgün idarə etmək də mühüm məsələdir. Güclü dövlət yalnız öz gücünü nümayiş etdirən dövlət deyil. Güclü dövlət həm də qazandığı imkanları uzunmüddətli milli məqsədlərə çevirə bilən dövlətdir.

Azərbaycanın qarşısında duran yeni siyasi mərhələni belə qiymətləndirmək olar.

Bu mərhələ dövlətçilik baxımından yeni imkanlar dövrüdür. Qarşıda daha böyük iqtisadi hədəflər, daha geniş beynəlxalq əməkdaşlıq, regionda yeni nəqliyyat və enerji imkanları, ölkəmizin qlobal proseslərdə daha fəal iştirakı üçün əlverişli şərait var. Lakin imkanların nəticəyə çevrilməsi siyasi iradə, peşəkar idarəçilik və ardıcıl dövlət strategiyası tələb edir.

Cənab Prezident İlham Əliyevin siyasi kursunun əsas üstünlüklərindən biri də strateji məqsədlərlə gündəlik siyasi qərarlar arasında əlaqəni qorumaqdır. Ulu Öndər Heydər Əliyevin dövlətçilik fəlsəfəsində olduğu kimi, burada da dövlətin uzunmüddətli maraqları cari siyasi proseslərdən üstün tutulur.

Bu, əslində, siyasi varisliyin ən mühüm göstəricilərindən biridir.

Siyasi varislik yalnız eyni fikirləri təkrarlamaq deyil. Əsl varislik əvvəlki nəslin yaratdığı dövlətçilik təcrübəsini qorumaqla yanaşı, onu zamanın yeni çağırışlarına uyğun inkişaf etdirməkdir. Ulu öndər Heydər Əliyev siyasi məktəbinin mahiyyəti də məhz belə çevik, realist və dövlət maraqlarına əsaslanan yanaşmadan ibarətdir.

Azərbaycanın bugünkü siyasi kursunda biz bu davamlılığı aydın görürük.

Ulu Öndərin qurduğu möhkəm dövlətçilik təməlinin üzərində cənab Prezident İlham Əliyev Azərbaycanın yeni əsrdə qarşılaşdığı çağırışlara uyğun siyasət formalaşdırıb. Bu siyasətin nəticəsində ölkəmiz yalnız öz təhlükəsizliyini və ərazi bütövlüyünü təmin edən dövlət kimi deyil, regionun siyasi gündəminə təsir göstərən və beynəlxalq münasibətlər sistemində öz sözünü deyən dövlət kimi mövqeyini möhkəmləndirib.

İndi əsas məsələ bu siyasi və tarixi kapitalı gələcəyin inkişaf kapitalına çevirməkdir.

Yeni siyasi mərhələ Azərbaycan qarşısında yeni məsuliyyətlər qoyur. Dövlətimizin gücü, xalqımızın birliyi, cəmiyyətin sabitliyi və milli maraqlar ətrafında formalaşan həmrəylik bundan sonrakı uğurlarımızın əsas dayaqlarıdır.

Biz artıq tariximizin bir mərhələsini başa çatdırmışıq. Qarşıda isə yeni mərhələ dayanır.

Bu mərhələdə Azərbaycanın ən böyük üstünlüyü ondan ibarətdir ki, dövlətçilik yolunun istiqaməti bəllidir, milli maraqların müdafiəsi siyasi kursun əsasını təşkil edir və bu kurs Ulu Öndər Heydər Əliyevin yaratdığı dövlətçilik məktəbinin müasir dövrün tələblərinə uyğun layiqli davamı kimi inkişaf edir.

Azərbaycanın qarşısında yeni siyasi mərhələ açılır.

Bu mərhələnin əsas şərti isə dəyişən dünyada dəyişmədən qalmaq deyil, dəyişən dünyanın içində milli maraqları qoruyaraq daha da güclənməkdir.