Qərbi Azərbaycan İcması

Əziz Ələkbərli,
Milli Məclisin deputatı
Qərbi Azərbaycan İcması
İdarə Heyətinin sədri

Dünyanın təhlükəsizlik mənzərəsi sürətlə dəyişir. Bir regionda baş verən münaqişənin siyasi, iqtisadi və enerji nəticələri artıq həmin ərazi ilə məhdudlaşmır. Belə bir şəraitdə Türk Dövlətləri Təşkilatının təhlükəsizlik məsələlərinə daha ciddi yanaşması xüsusi əhəmiyyət daşıyır. Cənab Prezident İlham Əliyevin TDT-yə üzv ölkələrin təhlükəsizlik üzrə rəhbər şəxslərini qəbul edərkən səsləndirdiyi fikirlər Türk dünyasının qarşıdakı dövr üçün gündəliyinə dair mühüm mesajlar verir.

Cənab Prezident İlham Əliyev Türk dövlətləri arasında əməkdaşlığın artıq yalnız iqtisadi, mədəni və humanitar əlaqələrlə məhdudlaşmadığını diqqətə çatdırdı. Dəyişən beynəlxalq şərait təhlükəsizlik sahəsində də daha sıx əməkdaşlığı zəruri edir. Təhlükəsizlik anlayışına enerji və nəqliyyat marşrutlarının, kommunikasiyaların, informasiya sistemlərinin və digər strateji sahələrin qorunması da daxildir.

Azərbaycanın bu məsələdə xüsusi mövqeyi var. Ölkəmiz Xəzər dənizi ilə Mərkəzi Asiyanı Türkiyə və Avropa ilə birləşdirən mühüm bağlantı nöqtəsidir. Cənab Prezident İlham Əliyevin illərdir həyata keçirdiyi enerji və nəqliyyat siyasəti Azərbaycanın bu mövqeyini daha da möhkəmləndirib. Bakı-Tbilisi-Qars dəmir yolu, enerji layihələri və Orta Dəhliz üzrə əməkdaşlıq ölkəmizin regional əhəmiyyətini artırıb.

Bu baxımdan enerji və nəqliyyat məsələlərinin təhlükəsizliklə birlikdə nəzərdən keçirilməsi tamamilə təbiidir. Cənab Prezidentin də vurğuladığı kimi, enerji və nəqliyyat layihələrinin təhlükəsizliyi yalnız bir ölkənin deyil, həmin marşrutlardan istifadə edən bütün tərəflərin ümumi marağıdır. Azərbaycanın illərdir həyata keçirdiyi regional bağlantı siyasətinin əhəmiyyəti də getdikcə artır.

Türk dünyası ilə münasibətlərin inkişafı Cənab Prezident İlham Əliyevin xarici siyasətində mühüm istiqamətlərdən biridir. Azərbaycan-Türkiyə müttəfiqliyi, Mərkəzi Asiya dövlətləri ilə genişlənən əlaqələr, qarşılıqlı investisiyalar, enerji və nəqliyyat layihələri bu siyasətin real nəticələridir. Türk Dövlətləri Təşkilatının daha da güclənməsi isə bu əlaqələrin daha geniş və sistemli əməkdaşlığa çevrilməsi baxımından mühüm imkanlar yaradır.

Təhlükəsizlik sahəsində də belə əməkdaşlığa ehtiyac var. Terrorizm, transmilli cinayətkarlıq, kibertəhdidlər və informasiya təhlükəsizliyi bir dövlətin təkbaşına həll edə biləcəyi məsələlər deyil. Cənab Prezident İlham Əliyevin TDT ölkələrinin təhlükəsizlik üzrə rəhbər şəxsləri ilə görüşündə bu istiqamətdə əməkdaşlığın əhəmiyyətinə diqqət yetirməsi Türk dövlətlərinin yeni çağırışlara birlikdə cavab verməsinin vacibliyini göstərir.

Türk dövlətlərini birləşdirən yalnız ortaq tarix və mədəniyyət deyil. Bu gün onların qarşısında ortaq maraqlar və çağırışlar da var. Buna görə də Türk dünyasının gələcəyi qarşılıqlı etimadın və praktiki əməkdaşlığın nə qədər möhkəm qurulmasından asılı olacaq. Cənab Prezidentin Türk dünyasının birliyi ilə bağlı siyasətinin əsas xüsusiyyətlərindən biri də məhz tarixi və mənəvi yaxınlığı real əməkdaşlıqla tamamlamasıdır.

Bu prosesdə gənclərin də mühüm rolu var. Türk dünyasının gələcəyi yalnız dövlətlərarası sənədlərlə müəyyənləşməyəcək. Ortaq tariximizi, mədəniyyətimizi və dəyərlərimizi tanıyan gənc nəsil xalqlarımız arasında əlaqələrin daha da möhkəmlənməsinin əsas dayaqlarından biri olacaq. Cənab Prezident İlham Əliyevin gənclər arasında əlaqələrin genişləndirilməsinə verdiyi əhəmiyyət də bu baxımdan xüsusi diqqət çəkir.

Bu gün Türk Dövlətləri Təşkilatının qarşısında böyük imkanlar var. Geniş coğrafiya, enerji ehtiyatları, nəqliyyat imkanları, artan iqtisadi potensial və ortaq tarixi-mədəni bağlar bu təşkilatın güclənməsi üçün ciddi əsas yaradır. Məsələ həmin imkanları necə birləşdirmək və onları real əməkdaşlığa çevirməkdir.

Bakıda TDT ölkələrinin təhlükəsizlik üzrə rəhbər şəxslərinin bir araya gəlməsi bu baxımdan mühüm hadisədir. Cənab Prezident İlham Əliyevin görüşdə səsləndirdiyi fikirlər göstərir ki, Azərbaycan Türk dünyasının təhlükəsizliyi və inkişafına yalnız bu günün deyil, gələcəyin məsələsi kimi yanaşır.

Türk dünyasının gücü onun ortaq keçmişində olduğu qədər, ortaq gələcək qurmaq imkanındadır. Azərbaycanın bu prosesdəki rolu isə Cənab Prezident İlham Əliyevin müəyyən etdiyi strateji xətt, ölkəmizin əlverişli coğrafi mövqeyi və son illərdə yaradılmış siyasi-iqtisadi imkanlarla daha da artır. Qarşıdakı dövrdə əsas məsələ bu imkanları daha sıx əməkdaşlığa çevirməkdir.